Kameel – Verandering

Hoe verander tye. Vandat hy drie jaar oud was het ek ons kleinseun elke middag by die kleuterskool gaan oplaai. Maandae het ek hom vir arbeidsterapie, en Woensdae vir spraakterapie gevat. Albei het baie huiswerk gegee en dié het ons elke middag na kleuterskool gedoen. Hy is skooltoe, en toe was dit smiddae huiswerk. Min het ek besef dat die ou blondekopseuntjie my jare later sou rondry. Gelukkig onthou hy nog baie van ons tye saam. Vir my sal dit altyd die kosbaarste jare bly. Ek en die kind wat so diep diep in my hart gekruip het.

Hy het my dokter toe gevat. Sal die man wat al twintig jaar my dokter is nou sy spreekkamers staan en verskuif het. Daar is nie ‘n manier waarop ek ooit daardie gebou by myself gaan vind nie. “Vir wat het dokter dit nou loop en doen,” wou ek weet. O, jy is een van daardie mense wat verandering haat,” sê hy laggend. “Jip, ek soek dinge soos dit altyd was.” Na ons stad toe getrek het, het ek seker vir drie jaar 150 km na my haarkapster tussen die mielielande toe gery. Het sy nie dood verongeluk nie het ek seker nou, twintig jaar later nog na haar toe gegaan.

My spieël sê vir my verandering is onvermydelik, maar ek hoef nie daarvan te hou nie…. alhoewel dit heel lekker is dat my kleinseun nou die bestuurwerk doen.

Mooi loop!!!