Kameel – ‘n Lieflike geur

Scrapy se Maandag = Wasdag Uitdaging. Sintuie

Die soet reuk van die Murraya Exotica se blomme hang nou al vir ‘n paar dae swaar in die lug. Dis nie net ‘n mooi gesig nie, maar ook ‘n lieflike geur wat die lug in en om die huis vul, en al jou sintuie aantas. Nog donker vanoggend word ek wakker en so oorweldigend is die reuk dat ek my vir ‘n oomblik verbeel ek lê op ‘n bed van wit blommetjies, en kan die sagtheid daarvan onder my vingerpunte voel.  Ek asem die reuk diep in en proe die soet op my tong. Dit laat my aan Salomo en die Shulamite vrou se liefdesverklarings dink. Hoe wonderlik dat God ons die vermoë gegee het om al hierdie dinge te geniet. Dan hoor ek dit; ‘n voëltjie begin sy dag met ‘n loflied aan sy Skepper. Stadig maar seker ontwaak die wêreld en ek wonder of ons aardse aanbidding aan ons God nie ook voor Hom opstyg soos die lieflike geur van die Murraya Exotica nie.

Mag hierdie Kersgety vir julle ‘n lieflike geur afgee, wat julle nog lank sal bybly.

Mooi loop!!!