Kameel – Misterie van die ou biblioteek – hoofstuk 1

Dis ‘n byenes van bedrywigheid soos die Towerinne werk om die “biblioteek” van die ou herehuis te restoureer. Dis definitief ‘n skat wat hier ontdek is – maar die vraag op almal se lippe is “Hoekom?” Hoekom al jou boeke en meubels net so los; liewe land tot die gordyne hang nog. Maar almal is opgewonde dat Rebusfontein sy eie misterieuse biblioteek gaan hê.

Perdebytjie is ywerig besig met haar stoflap. Hester en Positief laat ons skater wanneer hulle skoonmaakmiddels neersit om ons met ‘n gumbootdans te vermaak.  Toorts in haar rooi kopdoek borrel oor van energie. Christa en haar besem vee dat die stof so staan. Bondels is in haar element waar sy op die leer staan en verf. Woordnoot skuur hout af – ‘n blik Doom staan gereed vir spinnekoppe. Vuurvliegie wonder of ons nie teëls moet lê as sy eers die verslete ou mat verwyder het nie. Una wou die kaste helderkleurig verf, maar dis ‘n besluit vir later, nou was sy en Scrapy mure af. Seegogga, Virgo en Trommeltjies is buite besig met die ou meubels.

Met ‘n breë glimlag, en mandjie oor die arm stap tannie Frannie die vertrek binne. “Tyd vir versnappering!” roep sy vriendelik. Die Towerinne sug verlig. Eers gou hande en gesigte was dan kan ons eet. Was ons bly toe ons in die oorgroeide tuin ‘n put ontdek het. Dit het ons waterprobleem opgelos. Ons maak onself onder ‘n groot ou boom tuis. Virgo gaan lê plat op die aarde en sug behaaglik. “Nou waar bly tannie Frannie, ek is morsdood honger?” sê Trommeltjies. Versigtig om nie oor los klippe te val nie kom tannie Frannie aangeloop; mandjie oor een arm en ‘n boek in haar ander hand. “Jammer Towerinne maar ek kon my nuuskierigheid nie langer bedwing nie. Moes net kyk watse boeke daar is.”

Sy gooi ‘n tafeldoek op die grond oop en sit die mandjie bo-op neer. “Help julleself.” Heel duidelik is sy haastig om by die boek uit te kom. Sy gaan sit versigtig op ‘n vervalle ou bankie en slaan die boek versigtig oop. Ons laat nie op ons wag nie, maar val dadelik weg aan die lekkernye.  “Luister hier!!” roep tannie Frannie heel opgewonde. In haar hand hou sy ‘n vergeelde vel papier vas. “Ek het dit hier in die boek gevind.” Sy begin vir ons voorlees, en kos skoon vergete luister ons aandagtig.

My liefste Leonard

Jy het my gewaarsku dat ‘n brief in die verkeerde hande gevaarlik kan wees, maar ek kan die skeiding nie langer verduur nie.

Die verlange na jou is soos ‘n brandende vuur in my binneste. Jy alleen kan dit blus maar tevergeefs hou ek dIe pad dop. Is ek besig om van my kop af te raak Leonard? Ek word in die nagte wakker en voel jou warm liggaam teen myne. Ek luister na jou reëlmatige asemhaling en vreugde oorweldig my. Jy is hier, jy is by my!!! Ek strek my arms uit om jou te omhels maar al wat daar is, is ‘n leë bed en die eensaamheid wat my in sy wurggreep beet het, en al dieper die afgrond intrek. Hoeveel nagte moet ek nog my kussing nathuil voordat jy gaan kom en my in jou arms neem en verseker van jou ewige liefde? Ek wil in jou oë kyk, ek wil die liefde soos ‘n vuur in jou oë sien brand terwyl jou liggaam dit bevestig.

Ek en jy hoort bymekaar, ons is mekaar se lewensasem, maar daar staan soveel dinge in die pad van ons liefde?  Maak dit saak wat Thomas sal sê, of Isabella met haar aansitterige maniertjies? Maar Klara!!! Daar hang so ‘n donker wolk oor haar dat ek jou besorgdheid verstaan. En dan is daar Mnr Hardy!!! Net die gedagte aan hom gee my koue rillings. My intuïsie sê vir my vir net ‘n kok – soos jy altyd sê – weet Mev Marks te veel.

My Leonard kon ons maar Eden, sy mense en geheime agterlaat, en na ons eie paradys toe vlug…. Far away my love…. Far from the madding crowd!!!

“Wie het dit geskryf?” wil almal gelyktydig weet. “Die persoon se naam is afgeskeur” sê tannie Frannie, en hou die vel papier in die lug sodat ons kan sien. Sy kyk fronsend na die papier. “Far from the madding crowd,” mymer sy, en dan verhelder haar gesig.

Tannie Frannie sal verder vertel.

Mooi loop!!

Ons InLinkz skakel vir hierdie uitdaging is https://fresh.inlinkz.com/p/3f26291088494dc99c7aa4554a66a313

Bloggers wat nog nie voorheen deelgeneem het aan ons Lê-Jou-Eier bloguitdagings nie: Om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakels Lê-Jou-Eier: Reëls en Lê-Jou-Eier: Hoe neem ek deel? Laasgenoemde blogpos bevat ook al die onderwerpe en skakels na vorige uitdagings.

Advertisements