Kameel – Die leeutemmer

“Ek hoor daar het ‘n leeu en vlooi en of ander vlieënde muis van Barnum se sirkus die trein verpas, ons sal hulle eers moet kry. Skryf die finale.” So sê Vuurvliegie vir my. Hier dan is my taak.

“Mamma mia, mamma mia,” is die enigste woorde wat sin maak uit die stortvloed Italiaanse woorde wat Lorenzo uiter, terwyl hy sy kop vasgryp, en dan weer met sy arms wild in alle rigtings beduie. Hester probeer hom kalmeer, maar die man is buite homself. Koppie in die hand staan ek die toneel en dophou. Ek wou suiker kom leen, en kom toe op die petalje in die stoepkamer af. “Ek dink hy probeer jou sê dat sy eend weg is Hester,” laat ek ongevraagd van my hoor. Die twee tol om en Lorenzo skud sy kop geesdriftig. “Si, si” sê hy en wys na modderspore op die vloer. By nadere ondersoek kyk ons grootoog na mekaar. “Dis leeuspore,” fluister Hester, en ek knik my kop instemmend. “Natuurlik een van die sirkusleeus wat ontsnap het,” sê Hester weer – maar hierdie keer is daar iets onheilspellends in haar stem. Dit voorspel niks goeds vir die leeu nie. Ook nie vir my nie maar ek het dit nie toe geweet nie. “As daardie leeu dink hy kan by my huis instap en maak en breek soos hy wil sal hy vandag uitvind wie is baas hier.” Met die woorde stap sy by die stoepkamer uit, en kom ‘n rukkie later in sirkusklere terug.

Sweep in die hand staan sy daar. ‘n Groot ou Sanna gooi sy vir Lorenzo, “You only shoot when I say so.” “Kom Kameel!” en met ‘n knik van haar kop wys sy ek moet saamstap. “Hester ek het net suiker kom leen,” stribbel ek teë, maar sy val my in die rede. “Jy wou mos sirkus speel, wel vandag gaan jy sirkus sien. KOM!!” “Waar gaan jy vir die leeu soek?” waag ek ‘n vraag, en kry yskoue rillings toe sy my antwoord. “In die grot, waar anders?” Ek steek soos ‘n steeks perd vas, “Oooooo asseblief ek wil nie grot toe gaan nie, ek is bang vir vlêrmuise!!” Maar Hester is ongenaakbaar. “Vlêrmuise, my voet daar loop ‘n leeu los en jy is bang vir ‘n vlêrmuis.” “KOM!!”

‘n Mens kan duidelik sien Hester is op ‘n misie soos sy berg se kant toe stap. Ek kom bibberend agterna, en dan Lorenzo met die sanna oor sy skouer. Miskien kan ek Lorenzo oorhaal om vir my op die uitkyk vir vlêrmuise te wees. Ek stap stadiger totdat hy net hier agter my is. “Lorenzo,” fluister ek “when you see a mouse with wings, will you please shoot it.” Verbeel ek my of is daar ‘n snedige uitdrukking op sy gesig toe hy so ewe sarkasties vir my sê, “Why do you speak in such childish jabber Camel, do you think I am intellectually impaired? If you mean a bat, say so, and no I will not shoot it, I take my orders from Hester and her only.” Het ek valstande gehad sou ek dit net daar ingesluk het van verontwaardiging. “Wie is jou Camel?” skreeu ek vir hom. “Lyk ek vir jou na ‘n pakkie sigarette?” “Waddehel!!” Hester het tot stilstand gekom en haar oë skiet vonke na my en Lorenzo toe. Ons staan soos twee skoolkinders voor haar. Sy lig haar sweep, “Luister nou mooi vir my, gedra julleself soos grootmense of ek klim vandag in albei van julle in.”

Hoe nader ons aan die grot kom hoe meer raak my bene soos jellie. En dan sien ek hom. Hy kom by die grot uitgevlieg. Sy vlerkspan so wyd soos ‘n klein vliegtuig, sy mond wawyd oop en sy tande!!! Hy kom direk op my afgevlieg. Ek gooi hom met die koppie maar dit verdwyn net by sy keelgat af, en dan is ek binne in sy mond. Alles word pikswart, en al wat ek hoor is my gille wat in die donkerte weergalm.

“Kameel,” die stem kom van vêr af. Ek probeer my oë oopmaak, en sien lig. “Is ek dood?” vra ek. “Nee, nee nie dood nie maar jy moes ‘n vreeslike nagmerrie gehad het. Ek het jou daar van my huis af hoor gil.” “Scrapy is dit jy?” vra ek…. as hierdie newels net wil lig. “Ja, dis ek. Kom sit regop en drink hierdie suikerwater.” Ek beur teen die kussings orent en sluk gehoorsaam die suikerwater. “Is Hester ok?” vra ek. Scrapy skud haar kop. “Hester sal ok wees wanneer daardie gegiste maroelas uit haar sisteem gewerk is. Sy loop daar op die meent in sirkusklere rond, en vertel vir almal sy is ‘n leeutemmer.” “Eina,” sê ek en lig my pajamatop op. “So ‘n vervlakste vlooi kyk hoe het hy my gebyt.”

Mooi loop!!

Volg hierdie skakel https://fresh.inlinkz.com/p/556868f82eae403d9143258e74ee97b1 om alle bydraes tot hierdie reeks in volgorde te lees.”

Advertisements